Ni hatari sana:Polisi Dom, Villa, Friends kitanzini

Faini kwa timu iliyofanya vurugu ni isiyopunguwa Sh500,000.

Dar es Salaam. Baada ya kukithiri kwa matukio ya vurugu katika michezo ya Ligi Daraja la Kwanza msimu huu, Bodi ya Ligi inataraji kutoa adhabu kali kwa Polisi Dodoma, Villa Squad na Friends Ranger.

Ofisa wa bodi ya ligi, Joel Balisidiya alisema bodi haiwezi kuvumilia vitendo vyovyote vya uvunjifu wa amani, kwani ni kinyume na sheria ya nchi na kanuni na taratibu zinazoendesha mchezo wa soka.

“Tumepokea kwa masikitiko taarifa za kupigwa kwa mwamuzi na wachezaji wa timu ya Polisi Dodoma, pia kitendo cha mashabiki wa Villa Squad na Friends Rangers kufanya vurugu kwenye mechi baina yao. 

Tutakaa kikao kupitia ripoti za matukio yote mawili na tutatoa adhabu kali kwa mujibu wa sheria zinazoendesha Ligi Daraja la Kwanza ili iwe fundisho kwa wengine,” alisema Balisidiya.

Kwa mujibu wa kanuni ya 27, ya udhibiti wa wachezaji kipengele (g) kifungu (iii), inasema ‘Mchezaji yeyote atakayemshambulia mwamuzi, kiongozi, mtazamaji au mtu yeyote kwa namna yoyote ile, iwe kwa matusi au kwa vitendo ataadhibiwa kwa kufungiwa michezo isiyopungua mitatu (3) na faini isiyopunguwa Sh500,000.

Wakati kanuni ya 33 ya adhabu kwa klabu kipengele cha kwanza inasema ‘Klabu ina wajibu na jukumu la kuhakikisha kuwa wachezaji, viongozi, wanachama na wapenzi wake wanajiheshimu na hawajihusishi na vitendo vyovyote vya utovu wa nidhamu kama vile matusi, vitisho, vurugu, vitendo vinavyoashiria imani za kishirikina na vitendo vyovyote vingine visivyokuwa vya kimichezo kwenye viwanja vya michezo. Klabu ambayo mashabiki wake watafanya vitendo hivyo kitatozwa faini ya Sh 500,000. 

Wakati huohuo; Kocha wa Toto Africans, John Tegete amelaani vikali kitendo cha Polisi Dodoma kumpiga mwamuzi Ezekiel Ngoyi kwenye pambano dhidi yao kwenye Uwanja wa CCM Kirumba, Mwanza.

Tegete alisema hali kama hiyo ikiendelea kufumbiwa macho, mchezo wa soka hapa nchini utaonekana hauna maana yoyote na badala yake utachukuliwa kama uhuni.