Kova: Ole wenu wafuasi wa Gwajima

Kamanda wa Kanda Maalumu ya Dar es Salaam, Kamishna Suleiman Kova

JESHI la Polisi Kanda Maalumu ya Dar es Salaam, limetoa onyo kwa wafuasi wa Askofu wa Kanisa la Ufufuo na Uzima, Josephat Gwajima ambao leo wamepanga kumsindikiza kiongozi wao kwenda katika mahojiano na jeshi hilo.

Hatua ya wafuasi hao kutaka kumsindikiza kiongozi huyo, imekuja baaada ya kutangaziwa kujitokeza kwa wingi wakiwa katika kanisa hilo lilipo Kawe, jijini Dar es Salaam.

Akizungumza na waandishi jana, Kamanda wa Polisi Kanda Maalumu ya Dar es Salaam, Kamishna Suleimani Kova, alisema Askofu Gwajima anaruhusiwa kwenda katika mahojiano na wanasheria pamoja na wasaidizi wake wasiozidi watano tu.

“Ni bora wafuasi hao wakaendelea na shughuli zao za kawaida zikiwamo za uzalishaji mali kuliko kurundikana katika geti la polisi kwa sababu watakaofika kituoni hapa bila kuitwa watachukuliwa hatua za kisheria,” alisema Kova.

Alisema kutokana na hali hiyo, hawategemei kuona mrundikano katika maeneo hayo kwani kufanya hivyo ni kusababisha mkusanyiko usiokuwa na kibali.

Kwa upande wake, mwanasheria wa Gwajima, John Mallya, alisema mpango wa waumini wa kanisa hilo kumsindikiza kiongozi wao upo pale pale.

“Waumini wataenda kama kawaida kumsindikiza kiongozi wao kwa hiyo mpango huo utabaki pale pale kama walivyotangaziwa,” alisema Mallya.

Mwishoni mwa mwezi uliopita, Askofu Gwajima alifikishwa kituoni hapo kwa tuhuma za kutoa maneno ya kashfa dhidi ya Askofu Mkuu wa Kanisa Katoliki Jimbo Kuu la Dar es Salaam, Mwadhama Polycarp Kardinali Pengo.

Akiwa katika mahojiano, Askofu Gwajima alianguka na kuzimia hali iliyosababisha kukimbizwa katika hospitali ya polisi iliyopo Kurasini na baadaye kuhamishiwa katika Hospitali ya Taifa Muhimbili.

Baadaye alipelekwa na kulazwa katika Hospitali ya TMJ jijini Dar es Salaam kabla ya kuruhusiwa kutoka hospitalini hapo huku akiwa anasukumwa katika kiti cha wagonjwa.